عيد ميلاد ابو الفصاد

glitter-graphics.com

Purchase Nintendo DS Lite
glitter-graphics.com
glitter-graphics.com

النهارده عندنا عيد ميلاد

هوه المفروض بكره

بس احنا حنحتفل بيه النهاردة

قولولي ليه يا مفروسة

اقولوكم علشان بكره يمكن مش يكون ليا مزاج احتفل و ارجع للون الغامق تاني

المهم احنا بنحتفل بعيد ميلاد مين يا حلوين

بعيد ميلاد واحدة ملونه

عايشة فى وسطينا بالوانها الجميلة المزهزهة

مالهاش دعوة لا بشتا ولا بخريف

على طول ملونة و مشرقة

عرفتوا هيه مين؟؟؟؟؟

ايون

هيه ريمبو

المهم انا حاولت كتير اكتب بوست عنها

بس مش عرفت اكتب ايه ولا ايه ولا ايه

بصراحة كل حاجه حلوة و جميله

و ملا قتش  احسن من ارض الاحلام اللى اعملها عيد ميلادها فيه

بحب اقولها 

كل سنة و انتى طيبة يا داليا

و عايشة فى وسطينا 

و مخلية ايامنا ملونة

بدل الابيض و الاسود

و فى اعمال الخير سابقانا 

و كل سنة و انتى اجمل صاحبة فى العالم اللى يفرس ده

كل سنة و انى قريبة منى و مستحملة حركاتي اللى تفرس

و مزاجي اللى يفرس

كل سنة و انتى ام جميلة و زوجة صالحة

كل سنة و انتي صحبتي يا صحبتى

طبعا الاحتفال حيكون هنا

و حيكون فيه تورتات كتيره و بالونات و رقص و هيصة

و طبعا اللى داخل لازمن ولابد يجيب هدية

حطو بس انتو هداياكم هنا و انا حوصلهالها بمعرفتي

يالله فرفشوا و هيصوا و كلو و اشربوا ولا تسرفوا

على فكرة التورتات كلها ايس كريم

علشان انا عاملة دايت

هههههههههههههههه

نزلت صور التورات و مش لاقيتها

يظهر ساحت

هههههههههههههههههه

ارجعوا بقا هناك علشان اكلو التورتات

فارساكو انا

هههههههههههههه

Hi5 Falling Stars
Hi5 Falling Stars

*************************************************

بحلم....و يارب الحلم يتحقق

********************************************************

ازيكم جميعا

و حشتوني فى بيتي التاني ارض الاحلام

مش عارفه حتصدقوني لو قلتلكم ساعات بفتح البلوج ده و  اقعد فيه من غير ما اكتب حاجه

بحس براحة مش عارفه ليه؟؟؟

من شهر 7 مش كتبت فيه حاجه

لأ ن بصراحة مش لاقيت حاجه حلوة اكتبها فيه

و النهاردة نويت اكتب عن الحاجات اللى بحلم بيها علشان يارب يارب يتحقق منها حاجه فى 2009

بحلم :::اننا اولا نرضي ربنا

لاننا لو رضينا ربنا فى كل حاجه حيرضى علينا و الحياة حتكون افضل كتير

نرضي الله فى تعاملتنا مع بعضنا

نرضي الله فى اننا نحاول نعمل شوية من اللى بيقولنا عليه

بلاش نكدب....نحاول على الاقل...حتى لو كدب ابيض

لأن الكدب ممكن من غير ما نحس يخلينا نغش

ولو غشينا...ممكن من نغير ما نحس نسرق

و مش شرط السرقه فلوس..ممكن اسرق فكرة..اسرق احساس

ولو سرقنا...ممكن نقتل..و مش شرط القتل اراقة الدماء

لكن قتل المشاعر...و الاحاسيس...  وده الاصعب

يارب تكونوا فاهمين

لما قلت الدنيا بسيطة كنت اقصد البساطة  فى التعامل اللى بتخلى الامور تمشي ابسط

بحلم اننا ناخد بالنا من لسانا

اه اللسان اللى بكلمه واحده منه تخليني ادخل يا الجنه يا النار

بكلمه واحده منه تخلى الناس تحبني او تكرهني

بكلمه واحده منه اصلح بين الناس او اولعها حريقه

كتير منكم كتبوا عن اللسان انا عارفه و معلش حكتب تاني

و المفروض كلنا نكتب عنه 

بلاش نشتم.....الشتيمه مش جدعنه على فكرة ديه دليل على الضعف

فكروا كده..حتلاقوا اللى بيشتم انسان ضعيف..مش لاقى كلام  مفيد يقوله

بلاش الالفاظ الدخيلة علينا مش عارفه منين...و اكيد مش حنغيرها  فى يوم و ليلة

لكن نحاول نقلل منها..يعنى لو قولنا ها ..نقف شوية مع نفسنا كده و نفكر

على فكرة انا مش بقول على كل الكلام الدخيل

لاني زيكم بقول بعض الكلام اللى بعد ما بقوله بقول هوه مافيش كلمه تانيه تتحط مكانه

و لاقيت انه حتى لو فيه فهيه اتنست مع الزمن

و على فكرة الكلام بتاعي ده مش معناه انى موضه قديمة و لا مقفلة و لا متزمته

لأ

بس لو نلاحظ ان كلمة بتجر كلمة ووراها كلمة و ساعات مش بنبقى فاهمين المعاني

و بيبقى اصلا اللى مطلع الكلمه الغريبة قاصد بيها حاجه وحشة و احنا بنردد زي البغبغنات

فاكرينها  حاجة حتخلينا على الموضة..حاجه فانتازي

اوريجينال...روشنة....ههههه انا قلت اهو كلمه...

لأ بس بجد فيه كلمات انا بشوفها فى بوستات..مش ممكن... بزيادة و الغريب انها بتطلع ساعات من بنات

بحلم انها تختفي الكلمات ديه الصراحة او تبقى قليلة

بحلم اننا نحترم بعض..حتى لو فيه تفاوت ثقافي او اجتماعي

بس الاحترام واجب للكل

و لو احترمت الناس..الناس حتحترمنى و انا ححترم نفسي

و اهم حاجه الناس ...و خصوصا الاخوة العرب اللى بيدخلوا بلدنا

و بيلاقونا احنا مش محترمين بلدنا و لا نفسنا و لا بناتنا و لا اي حاجه

و بالتالي بتلاقيهم بيعملوا نفس التصرفات بس باسلوبهم

و لعلمكم لا يجرؤ واحد انه يتصرف فى بلدة بالطريقة اللى بيتصرف بيها هنا

بدليل المصريين اللى بيروحوا دول عربيه او اجنبيه

الناس هناك بتحترم نفسها و بتحترم بلدها و بتلاقى المصريين مبسوطين و بيقولوك 

اللى برة احسن و عيشتهم احسن و اسهل و ابسط

بحلم ان كل ام ربنا يقدرها على حسن تربية اولادها و يساعدها فى تربيتهم

زي ما بتعلم ابنها حاجه حلوه تحاول تعملها معاه وتتعود عليها هيه كمان

ده اخلاص فى العمل

اصل مش ممكن اكون بقول كلام وحش و ازعق لابني علشان بيقولها ده اسمه كذب على النفس

ربنا يقدر كل طالب على التركيز فى مذاكرته و يدي كل واحد على قد مجهوده

ربنا يهدى نفوس البشر......لان ابليس و ذريته انا متهيالى بقوا اكتر من البشر

ده مش معناه انه بعيد عنى

ابدا...ده كتير عمكم ابليس بيجي و يسيب كام عيل من عياله فى حجري و يمشي

بشتغلهم بيبي سيتر ..بس مش لوقت طويل و الحمد لله  

بحلم و يارب الحلم يتحقق

ان المدينة ديه ..مدينة البلوجرية

تبقى احسن من المدينة الخارجية

نحاول

و ان شاء الله حنقدر

كل سنة و انتم طيبين و بخير دايما يارب

Hi5 Falling Star*************************************************

@@@@@@@@@@@@@@@@@@@@@@@@@@@@@@@@@@@@@@@@@@@@@@@@@@@@@@@@

لقاااااء الاحلااااام

نعم إنه لقاء الأحلام

اليوم كان اللقاء النسائ للمدونات المصريات

الحالمات،المفروسات،البتنجانات،المفقوعات،الحونينات......،الفراشات،الملونات و الخيخات...و الدوبات

و السبهللاات،

اليوم كان الاجتماع التاني للسيدات الفاتنات

لما كان الإجتماع الاول....و ما سمعت عنه من لقاء كان ظريف و دمه خفيف...كان نفسي احضر الأجتماع التاني...اللي هوه كان النهاردة

بس بعد تردد دام طويلا...وده ليه؟؟

أولاً لأني افضح ما استرش....ثانيا...وده الاهم اللي همه ماعرفهوش...إني عاطفيه جدااا جدااا جدااا

و برتبط بالناس أوي...و ده حيخليني اتعامل معهم بعد ذلك بقلبي....اكتر من عقلي

قبل ما اشوفهم كان تعاملي معهم ... بعقلي اكتر..و بقلبي..حبه صغيرين...

بس دلوقتي بعد ما شفتهم ..القلب زق العقل و رجعه ورا و احتل المقدمة

مفروسة رااااااااااااااحت...أه راحت الإجتماع النسائي...و برضه و هيه مفروسة

و فرستهم و فرسوني

طيب إيه انطباعك يا مفروسة هانم.................عن الناس اللي كنتي حتى مش عاوزاهم يعرفوا عنك أي حاجه؟؟؟؟

ممممممممممممم

إنطباعي إنهم ناس جميله،حساسة،مخها حلو،نوعية الناس اللي نفسي اجيبها تعيش فى ارض الاحلام

حاولت على قد ما اقدر ...اني ابين فى ارائي الخطوط الرئيسة فى شخصيتي علشان..اصبح واضحه لهم نوعا ما...تجنبا ..من ان يحدث اي زعل من اي نوع

المجموعة اللي شفتها مجموعة جميلة فعلا...فضلت طول السكة و انا مروحه افكر فيهم...وافكر في المقابلة...وقد إيه كنت سعيدة

مين كان فى اللقاء؟؟؟؟

كتييييييييير..بس من اللي كنت رسمالهم صورة فى دماغي المفروسية...فاتيما

وطلعت حاجة تانيه خاااااالص

انسانة جميلة..و شخصية أجمل ........

و اللي طلعت تقريباً 90 في المية من ما تخيلته آبي

بنت جااااااااااااادعة.........بكل ما تحملة الكلمه من معنى

كلهم الصراحة كلهم ناس جميلة جداااا

و سبهلله،وقوس قزح،،ورئسة حزب الاحلام،ورودي بنوته مصريه

وخيخة....و مفقوعة...و دوبا

و بتنتين تانين لذاذ جدااا واحده بترفلاي..و التانية نبضات ..عمري ما زرتهم

منظري وحش صح؟؟؟؟بس حدور على المدونات بتاعتهم....بس همه كانوا تقريبا ساكتين

كأنهم كانو بيترقبوا الجو....

الملفت جداااا للنظر للمجموعة اللي انا فابلتها النهاردة

انها ناس حساااااااااااااااااااااااااااااااااااااااااااااااااااسة

جدااااااااااااااااااااااااااااااااااااااااااااااااااا

كنت فاكرة اني انا اكثر الناس حساسية...ولكني قابلت ناس زيي و يمكن اكتر

ناس جميله....

حتقولولي هيه الناس الحساسة جميلة؟؟؟؟؟؟

حقولكم جدااا كمان...لأنها بتبقى ناس بتحب بعضها من غير أغراض نفسية او مرضية

ناس بتحب ما حدش يجرحها...فبالتالي مش حتجرح حد

ناس مش بتحب الكدب فبالتالي مش حتكدب

مش بالضرورة انها تقول اي حاجه عن نفسها احتراما للخصوصية

ولكن لو قالت حاجه حتقول الحقيقة او تمتنع

ناس واضحه نوعا ما

وده يمكن اللي كان مخليني متردده اني اتعرف عليهم عن قرب

لأني حابة الناس ديه من غير ما اشوفها...و خايفه لو شفتها تطلع مخالفه لتخيلي..و ده حيزعلني

يا إما حلاقيها ناس قريبه من تخيلي و يمكن احسن كمان..و ده حيخليني احبهم بقلبي مش بعقلي

و الواحد لما بيرتبط بحد بقلبة بيكون اكثر حساسية من إنه يرتبط بيه بعقلة

و أي فعل يأتي مخالف ..يجرح......و يكون وقعه مؤلم

أما في حالة العقل.....الأفعال أيا كانت بتكون أقل تأثيراًً

و من هنا حقولهم

انتو وحشتوني من بعد ما سبتكم

*************************************************

السلطاااااانيه

رجعتلى تانى السلطانيه...قصدى التاج

و المره ديه جالى من نور...و انا بحب الاسم ده جدا لاسباب شخصيه

وطائر حزين

و بما ان التاج بيتكلم عن الاحلام ...فأنسب مكان للإجابه عنه هوه أرض الاحلام

اللى صدقت فعلا انها موجوده......و فعلا لما بتضايق افتحها و اقعد قصادها و بس

و بما إنى فى حالة إكتئاب و ديه حاله أكبر من الفارسه شويه

وأنا مش بحب المود ده ... و بحاول بكل ما لدي من طرق للتفريج عن نفسى

فأنا قررت أن أجاوب هذا التاج...

بسم الله

السؤال الاول:-

أذكر خمس أحلام على الأقل تخص ماضيك و تحلم فيها بتغير الأشياء....ماذا ستعدل....وماذا ستترك؟

1-أنا كنت باحلم انى اطلع الاولى فى المدرسة زى أخوتى و ده محصلش لانى ما كنتش بحب المذاكره

2-فى ثانوية عامه كان نفسى أطلع دكتورة أسنان.......بس إزاى ماهو انا أصلا مش بحب المذاكره.....بس دخلت كليه ايامها كل اصحابى فى المدرسة قالولى كوسة...و هيه ما كانتش كوسه كانت بطيخ ...بس ما حدش صدق منهم

3-كان نفسى أقعد فى البيت و تجيلى رخصة السواقة لغاية عندى من غير إمتحان ...لما كان من أبى من نفوذ...بس هوه صمم ..و قالى زيك زى بقية الناس...و اتبهدلت تعليم و عملت إمتحان زى بقية الناس

4-كنت بحلم انى اشتغل مع أجانب و اسافر كتير ...و ده نوعا ما اتحقق

5-كنت بحلم انى اتجوز واحد بحبه قبل الجواز...واسكن فى بيت حواليه جنينه و بحر لما للبحر من سحر خاص و غريب و عجيب على

اتجوزت واحد ما أعرفهوش ..و سكنت فى مكان حواليه جنينه كبيره بس مش بتاعتى ..اما البحر فإستبدلته بالبانيو

أذكر 5 أحلام على الاقل تخص مستقبلك؟

1-انى احج و اسقط الفريضه

2-نفسي جدا جدا انى أموت فى مكه أو المدينه

3-نفسى أحفظ القرءان

4-نفسى أن أكون تحت رجلين أمى وأخدمها ..وأحاول ان ادخل السرور الى قلبها

5-نفسى أشوف حال الناس إتعدل و بقوا يحبو بعض و يخافو على مشاعر بعض

أذكر شخصين على الأقل متواجدين فى حياتك حاليا كنت تود و جودهم قبل الآن بزمن.......

لا يوجد سوى أمى الآن و زمااااان.........

إذكر شخصين على الأقل غير متواجدين فى حياتك حاليا كنت تود وجودهم الآن أو في حياة أولادك مستقيلاً.........

أبى الله يرحمه..كنت أحب إنه يكون موجود معايا و استشيره فى حاجات كتيره

أهدى التاااااج لمين!!!

appy

Hina we Hinak

محمود رئيس جمهورية نفسه

عبده الرايق

أخف دم

كاميليا

عندى أسماء كتير و مش عارفه مين أخده و مين لسه

الريدر فوق ال125 اسم

اكتبهم كلهم.......؟

Hi5 Falling Stars**********************************************

رحله خارج ارض الاحلام

نهار جديد...يبدأ فى ارض ألأحلام بزقزقة العصافير و تفتح الزهور

وكعادة مفروسه ...صحيت و على وشها أحلى ابتسامه

ولكن النهارده صاحيه و في دماغها فكره

فكرة الخروج من أرض ألأحلام

و بعد التشاور مع اصحابها العصافير...و الورود

كان لازم تاخد موافقة أرض ألأحلام

وهكذا كان الحوار..............

صباح الخير يا أحلى أرض و أحب أرض

صباح النور يا مفروسه خير شكلك عاوز حاجه

اه انا عاوزه اخرج اجيب ناس من بره

لييييييييييه ما احنا كويسين كده

لا انا سمعت ان فيه ناس بره كتير عاوزه تعيش فيكى حروح اجبهم

ما تصدقيش...مافيش حد عاوز يعيش زى ما احنا عايشين...ده كلااااااام

لا انا حثبتلك انه مش كلااااااااااام و انه فيه ناس كتير نفسها تعيش زينا

طيب حتعملى ايه قوليلى علشان اطمن عليكى

حروح اعيش مع كل مجموعه شويه و اختار

تختارى؟ على اساس ايه؟

السلوك

السلوك؟؟؟؟؟

اه السلوك انتى مستغربه ليه ما هوه السلوك هوه اللى يهمنى

ههههههههههههههههههههههههه

انتى بتضحكى ليه؟

لانك حترجعى من غير ما تجيبى حد معاكى ههههههه

ماتقوليش كده ....انا حاجى و كل الناس معايا

هههههههههههههه ده كان زماااااااااان

ودلوقتى...كمان احنا بقينا 80 مليون...و زمان كنا اقل كتير

اه زمان كنتى تقدرى تجيبى منهم كتير و همه قليلين لكن دلوقتى بعد ما كتروا معتقدش

انا حسبتلك

حتتعبى

ححاول

حتتفرسى

ان شاء الله حقدر

ماتجيش تعيطيلى

لو حصل استحملينى ماليش غيرك اشكيله

طيب و حتعملى اييه؟

كل يوم حروح فى مكان و اجيب اللى اقدر عليه منهم و ارجعلك

هههههههههههههههههه عندك امل؟

كبيييييييييييييير

خدى بالك من نفسك

انا فى وسط اهلى برضه ما تنسيش

انا مانستشى همه اللى نسيوا

مش ممكن ينسوا اللى مخليهم فاكرين حاجات من 7000سنه

بس فيه حاجات كتيره نسيوها

حفكرهم

حتتعبى انا خايفه عليكى

قولى ان شاء الله ...ربنا معايا

مدام مصممه روحى و ماليش غير انى ادعيلك

ربنا يكفيكى شرهم

حرجعلك كل يوم اقولك انا عملت ايه و قابلت مين

وانا مستنياكى بكل الحب

الى القاااااااااااااااااااااااااااااااااء

فى رعاية الله

جريت مفروسه و حضرت شنطتها قوام ..ومانسيتش تحط فيها سجادة الصلاه و كتاب الله

وركبت الطياره و سافرت..............

ياترى يا مفروسه حتقابلى مين و حتعملى ايه؟

Hi5 Falling Stars
Hi5 Falling Stars
******************************************************************************

قريبا

يوميات واحده مفروسه فى ارض الاحلام

Hi5 Falling Stars
Hi5 Falling Stars

ارض الاحلام

ديه ارض انا بحلم بيها من زمان.........

كل ما كنت اقابل حاجه تفرس.. كنت اقول انا عاوزه اعيش فى مكان غير المكان ..

و فى زمان غير الزمان .. و مع ناس غير الناس......

نفسى اعيش فى مكان بدائى لا يوجد به تقدم........اه ...والله....

حتقولوا علي متخلفة........مش مهم ... ماهو كل اللى احنا...بنعانى منه بسبب التقدم .....

نفسى اعيش .. فى مكان .. كل الناس فيه بتلبس ابيض فى ابيض....

مافيش الوان فى المكان ده غير الاخضر و الازرق و الابيض.......

و الوان الفواكهه و الخضروات .. و بس.....

نفسى أعيش فى مكان .....شايفه فيه وجوه الناس..علشان اعرف التعابير على وشهم

نفسى اعيش فى مكان ...ناسه عندهم ضمير... يخافوا الله و يتقوه فى كل فعل من افعالهم

نفسى اعيش فى مكان نظيف .....لا تفوح منه غير روايح الخضرة و الفاكهه

نفسى اعيش فى مكان الاطفال فيه.. و الكبار .. مرسومة على وشوشهم ابتسامة صافية

نفسى اعيش فى مكان ...................... الضوضاء الوحيدة اللى فيه هى زقزقة العصافير...

و صوت الاطفال اللى بتجرى ورا بعضها

نفسى اعيش فى مكان ..ناسه ميهمهمش مين ديانته ايه..........

ولا بلده ايه.....كل اللى يهمه الناس تتعامل مع بعض كويس و فى سلام

نفسى اعيش فى مكان .........الناس كلها تحب بعض

تخاف على بعض

و اكيد فى المكان ده حاخد مامى..........واختى.....وجوزها....وولادها....وحماتها....و اكيد جوزى .. و حماتى.....

طيب يا خلتو انا ممكن اخد اصحابى.......(ده ابن اختى).طبعا يا حبيبى ....

يعنى ممكن آخد الكلاس كله............مافيش مانع

طيب و انا...(ديه بنت اختى)............اكيد ياقطة ممكن طبعا

يعنى ممكن انا كمان آخد الكلاس كله.......................اه طبعا

(همه الاثنين)طيب و حينفع ييجوا لوحدهم.......حيجيبوا مامتهم و باباهم.......................اوكى

طيب و اخوتهم.......و.......و........و..............و

طيب و انتى حتاخدى اصحابك؟ ..............اه طبعا

و بدات انا و همه نعد الناس اللى حناخدهم فى المكان الجميل اللى انا بحلم بيه............

و لقينا ان الحمد لله أخدنا الناس اللى فى البلد كلهم.................

و تقريبا بعد ما قعدت اعد كل اللى حاخدهم و عائلتهم و معارفهم و اصدقائهم...............وهلم جر

و طبعا كل اللى حيقرأ هذا الكلام .. و عائلته .. و اصحابه... و ...........

لقيت ان احسن حل .......................................

حسبكوا انتو تقولوا...................

على فكرة انا صاحية........